Франция президенти Эммануэль Макрон европалык коллегаларына Шенген зонасы коронавирустан улам чачырап кете турган болуп жатканын эскертти.
Өткөн жумада Европа биримдигинин башчыларынын саммитинин видеоконференциясында француз лидери пандемия аталган биримдиктин негизин жок кылышы мүмкүн деген билдирүү жасады. Макрон эгерде биримдикке мүчө өлкөлөр жаңы каатчылык менен күрөшүүдө тилектештигин көрсөтпөсө, шенгенге жана ачык чек араларга да кесепетин тийгизерин айткан.
Жонс Хопкинс Университетинин маалыматтарына караганда, Францияда COVID-19 вирусун жуктуруп алгандардын саны 37 575 адамга жеткен. Алардын ичинен 5 700ү айыгып кетсе, 2 314ү көз жумган.