БИШКЕК, 28-мар. — Sputnik. Бир жумадан бери Новосибирсктин Толмачево аэропортунан мекенине кете албай жаткан кыргызстандыктар бийликтин көңүлүн бурдуруу үчүн ачкачылык жарыялоону чечишти. Бул тууралуу Sputnik Кыргызстандын кабарчысына аэропортто калгандардын бири Ирена Степкичева билдирди.
Буга "Манас" аэропорту каттамдардын баарын жаап салганы себеп болууда. Орто жерде калган кыргызстандыктар өлкөнүн Новосибирсктеги башкы консулдугуна жана Тышкы иштер министрлигине кайрылган. Степкичеванын айтымында, дипломаттар аларга эч жардам бере алган эмес.
"Биз Новосибирсктеги башкы консулдукка 20-марттан бери кайрылууга аракет кылдык. Бирок алар биз менен байланышка эки күндөн кийин гана чыгышты. Мен ал жакта иштеген аялга абалды түшүндүрө баштаганда, "бул силердин ишиңер" деп телефонду коюп койду. Андан кийин трубканы эч ким алган жок. КР Тышкы иштер министрлигине чалганыбызда, Москвага учкула, ал жакта каттамдар бар дешти. Бирок бул мен үчүн мүмкүн эмес болчу", — деди кыргызстандык аял.
Степкичеванын айтымында, башкы консул аэропорттогу мекендештерине 27-март күнү гана келип, сүйлөшүп, алардын чыдай турушун өтүнгөн. Ошондой эле айрым жарандарды башка жакка жайгаштыра турарын айтып, кечинде кыргыз диаспора аларга тамак-аш алып келип берген.
Анын айтымында, айрымдарынын акчасы түгөнүп, баалуу буюмдарын күрөөканага койгонго аргасыз болушту. Эми кийинки апта Россияда дем алыш деп жарыяланганына байланыштуу аэропорттон кууп ийбесе экен деп коркуп жатышат.
Алар президент Сооронбай Жээнбековго жардам сурап, видеокайрылуу жолдошту.
Sputnik Кыргызстан агенттигине Тышкы иштер министрлигинен бул маселе боюнча иштеп жатышканын билдирип, бирок иш кайсы этапка жеткенин айтышкан жок.
Эске салсак, дүйнө боюнча коронавирус тарап жаткандыгына байланышуу "Манас" аба майданы бир катар авиакомпаниялардын рейстерин убактылуу токтоткон. Алардын арасында дал ушул Бишкек — Новосибирск — Бишкек каттамы дагы бар эле.