БИШКЕК, 28-мар. — Sputnik. Билим берүү жана илим министрлиги "Атам, апам жана мен, китеп окуйбуз баарыбыз тең" деп аталган үй-бүлөлүк китеп окуу саамалыгын жарыялайт. Бул тууралуу Билим берүү жана илим министрлигинен кабарлашты.
Анын максаты — үй-бүлөдө китеп окуу маданиятын калыптандыруу, ата-эне менен баланын мамилесин жакындатуу, үй-бүлөдөгү таалим-тарбия процессин жакшыртуу экени айтылды.
Китеп окуу саамалыгына ар бир кыргызстандык үй-бүлө катыша алат.
Министрлик балдардын жаш өзгөчөлүгүнө жана ата-энелерге ылайыктуу китептердин тизмесин сунуштаган. Ата-энелер күн сайын балдары менен биргеликте китеп окуп жана окуган китеби боюнча үй-бүлөлүк талкуу уюштурушу керек.
"Окуп бүткөн китебинен алган таасирлери боюнча кыскача эссе жазышат жана аны үй-бүлө мүчөлөрүнө окуп беришет. Андан кийин китептин мазмуну жөнүндө жазган эссенин текстин фейсбук баракчасына #үйдө_китеп_окуйбуз деген хештег менен жайгаштырышы жана социалдык желелер аркылуу башка жарандарга эстафета катары өткөрүп берүүсү керек", - деп айтылган маалыматта.
Министрлик саамалыкка активдүү катышкан үй-бүлөлөргө белектер ыйгарыларын билдирген.
Министрликтин сайтында сунуш кылынган китептердин тизмеси тиркелген.