БИШКЕК, 27-мар. — Sputnik. Кыргызстандын мугалимдери март айынын айлыгын толугу менен алышат. Бардык билим берүү мекемелеринин кызматкерлерине маянасы которула баштады. Бул тууралуу Sputnik Кыргызстан агенттигине Билим берүү жана илим министрлигинин маалымат катчысы Акылбек Орозматов билдирди.
Орозматов бул маалыматты төгүндөдү. Анын айтымында, мугалимдер айлыгын өз мөөнөтүндө алышат. Мындан ары деле педагогдор үйдөн окуучуларды дистанттык түрдө окутканы үчүн кадимкидей эле толук көлөмдө айлык акысын алышат.
Эске салсак, 16-марттан тарта өлкөдөгү мектеп ЖОЖ, билим берүү жайларынын баары карантинге жабылган. Кийинчерээк бала бакчалар да таратылган. Буга чейин Билим берүү министрлиги эгер мөөнөтсүз каникул узартыла турган болсо, 8-апрелден тарта орто мектептин окуучулары төртүнчү чейректи дистанттык (үйдө отуруп) негизде окууга киришерин айткан.
Коронавирус Кыргызстанда
Бүгүн Кыргызстанда коронавирус жуктуруп алган адамдардын саны 58ге жетти. Жаңы учур Сузак (7), Өзгөн (3), Кара-Суу (1), Ноокат (1) райондорунда жана Ош шаарында (1) катталды. Вирус жуктуруп алгандардын ону аял, төртөө эркек киши.
Бишкек, Ош, Жалал-Абад шаарлары жана Ноокат, Кара-Суу, Сузак райондоруна 15-апрелге чейин өзгөчө абал киргизилген.
Учурда өлкө аймагындагы кырдаал тууралуу Sputnik Кыргызстандын тексттик баяндамасынан кабардар болуп туруңуз.