БИШКЕК, 27-мар. — Sputnik. Коронавируска жана өлкөдөгү абалга байланыштуу жалган маалымат тараткан дагы эки адам кармалгандыгы тууралуу УКМКнын маалымат кызматынан кабарлашты.
Алар 23-мартта атайын кызматтын Ички иштер министрлиги менен биргеликте жүргүзгөн ыкчам-издөө иш чараларынын учурунда колго түшүрүлгөн.
"Биринчиси Баткен облусунун Кызыл-Бел айылында жашаган 56 жаштагы аял. Ал коронавирус боюнча кырдаалга байланыштуу жалган маалыматтарды тараткан. Ал эми Нарын облусундагы Ат-Башы районунун Ача-Кайыңды айылында жашаган 36 жаштагы эркек Кочкор санитардык постунда укук коргоо органдарынын кызматкерлери текшербестен 200 сом алып кое берүүдө деген кабарды жайылтып жиберген", — деп айтылат билдирүүдө.
Маалыматка караганда, экөө тең түшүндүрүү иш-чаралары өткөрүлгөн соң күнөөлөрүн мойнуна алып кечирим сурашты. Учурда алардын кылган ишине юридикалык баа берүү боюнча аракеттер жүрүп жатат.
УКМК ички иштер органдары менен биргеликте коронавирустун таралышы боюнча жалган маалымат, ушак тараткан тараптарды аныктап, коомдук-саясий жана эпидемиологиялык абалды туруктуу сактоо боюнча тиешелүү иш-аракеттерди жүргүзүүнү улантууда. Мындан тышкары, ушак тараткандар мыйзам чегинде жоопко тартыларын эскертет.