БИШКЕК, 27-мар. — Sputnik. Бүгүн, 27-мартта, COVID-19 вирусун жуктургандардын саны боюнча АКШ Кытайды артка калтырып, биринчи орунга чыкты. Бул тууралуу Жон Хопкинс атындагы университеттин Системалуу изилдөө жана инжиниринг борборунун сайтынан көрүүгө болот.
Буга чейин Ухань шаарында пайда болгон вирусту жуктургандардын саны боюнча биринчи орунда Кытай келе жаткан. Өткөн түнү АКШ андан ашып, Италия дээрлик теңелип калды. Тагыраагы, ушул тапта Америкада коронавируска 85 653 киши кабылды. Алардын арасынан 1290 киши көз жумуп, 713 киши сакайды. Кытайдын өзүндө жалпы ооругандар 81 782, өлгөндөр — 3291, айыккандар — 74181. Ал эми Италияда илдетке 80 589 киши чалдыкты. Каза тапкандар — 8215, жакшы болуп кеткендер — 10 361 киши.
Андан кийинки орундарда Испания (57 786 киши жуктурган), Германия (43 938), Франция (29 566), Иран (29 406), Улуу Британия (11 812), Швейцария (11 811) турат. Мындан башка өлкөлөрдө жуктургандардын саны 10 миңге жете элек.
Ал эми жер жүзү боюнча ага кабылгандардын саны 531 860ка жетти. Өмүрү менен кош айтышкандар — 24 057, айыккандар 122 203 болду.
Коронавирус тууралуу
Баса, буга чейин коронавирус алгач кимден аныкталганы боюнча да маалымат жарыяланган.