БИШКЕК, 24-мар. — Sputnik. 25-26-март күндөрү Кыргызстандын аймагында абанын температурасы кескин төмөндөп, жаан-чачын, тоолуу аймактарда карга айланышы мүмкүн. Бул тууралуу ӨКМден билдиришти.
25-мартта Ош, Жалал-Абад, Баткен, Нарын облустарынын көпчүлүк аймактарында, Чүй, Талас, Ысык-Көл облустарынын кээ бир райондорунда жаан, тоо этектеринде жаан карга айланары божомолдонууда.
26-мартта көпчүлүк аймактарда ушундай эле аба ырайы кармалып, өлкөнүн түштүгүндө жаан-чачын катуу жаай турганы айтылды.
Тоолуу райондордо жолдор тоңголок, тайгак болуп, кар күрткүсү пайда болот. Батыштан соккон шамалдын ылдамдыгы секундасына 4-9 метрден кээ бир райондордо 15-20 метрге чейин жетиши мүмкүн.
Бишкек — Ош жолунун 121-138 (Төө-Ашуу ашуусу), 198-265-чакырымдарында (Ала-Бел ашуусу, Чычкан капчыгайы), Ала-Бука — Каныш-Кыя жолунун 71-74-чакырымдарында (Чапчыма ашуусу), Красная-Горка — Ак-Таш жолунун 1-4-чакырымдарында, Казарман — Ак-Тал-Чат унаа жолунун 67-93-чакырымында (Кара-Коо ашуусу) көчкү түшүү коркунучу бар.
Унаалардын ортосундагы 500 метр аралык чектелиши зарыл.