БИШКЕК, 21-мар. — Sputnik. Өзгөчө кыдаал өзгөчө абалдан эмнеси менен айырмаланаарын биринчи вице-премьер-министр, мурдагы өзгөчө кырдаалдар министри Кубатбек Боронов түшүндүрүп берди.
Эске салсак, учурда Кыргызстанда коронавирус жуктурган 12 адам бар. Алар жашаган Сузак районуна жана Баткен облусуна караштуу Баткен районунун үч айыл өкмөтүнө өзгөчө кырдаал киргизилди. Коопсуздук кеңеши болсо премьер-министрге Кыргызстан боюнча өзгөчө кырдаал режимин киргизүүнү сунуштады.
Бороновдун айтымында, өзгөчө кырдаал өзгөчө абалдан бир аз жеңилирээк болуп, чектөөлөр салыштырмалуу аз.
"Өзгөчө кырдаал учурунда атайын эпидемиялык иш-чаралар жүргүзүлөт. Элдердин жүрүм-турумуна чектөөлөр коюлат. Бирок экономикалык жана ошол сыяктуу башка иш-чаралар акырындык менен ишке аша берет. Элдин күнүмдүк турмушу уланат, бирок зарылдыгы болбогон учурда ары-бери каттап, коомдук жайларга баруусуна, топтошуп чогулууга тыюу салынат", — деп түшүндүрдү Боронов.
Ал эми өзгөчө абал кризистик учурларда киргизилет. Мисалы, эпидемия, эпизоотия, эпифитотия жаралса. Бул учурда катардагы жарандардын жүрүм-туруму жана бийлик органдарынын аракеттери тууралуу Sputnik агенттигинин макаласынан кененирээк окуп алыңыз.
Коронавирус Кыргызстанда
Ал эми 20-мартта умрага барып келген дагы үч адамдан COVID-19 табылганы маалым болгон. Алар Ош облусуна караштуу Ноокат районунун тургундары. Учурда аймактык ооруканада жатышат, үчөөнүн тең абалы канааттандырарлык.
21-мартта дагы Сузактын беш, Баткендин бир тургунунан COVID-19 аныкталды.