БИШКЕК, 21-мар. — Sputnik. Мектептерде окуу мөөнөтү жай айларына чейин узартылбайт. Бул тууралуу брифинг учурунда билим берүү жана илим министринин орун басары Нурлан Өмүров билдирди.
Министрлик төртүнчү чейректеги окуу процессин дистанттык негизде окутуу боюнча бир катар иш-чараларды өткөрүп жатат.
“Биздин максат – интернеттин бар-жогуна карабастан, бардык окуучуларды камтуу. Ошондуктан биз ТВ, уюлдук тиркемелер жана мессенджерлер аркылуу аралыктан окуунун альтернативдүү ыкмаларын иштеп жатабыз. Мындан улам, билим берүү мекемелерине киргизилген үч жумалык карантиндин убактысы узартылса, окуу процесси үзгүлтүккө учурабайт”, — деди Өмүров.
Ал эми министрликтин сайтында келерки жума ичинде 1-11-класстар үчүн “санарип дарбаза” порталы ишке кирери кабарланды. Бул порталдан алынган билимди бекемдөө үчүн окуу материалдарды, атайын тесттерди көрүүгө болот.
Эске салсак, Кыргызстанда мектептер жана жогорку окуу жайлары 16-марттан тарта үч жумага карантинге жабылган. Мындан тышкары, бала бакчалар абал турукташканга чейин таратылган болчу.
Коронавирус Кыргызстанда
Ал эми 20-мартта умрага барып келген дагы үч адамдан COVID-19 табылганы маалым болгон. Алар Ош облусуна караштуу Ноокат районунун тургундары. Учурда аймактык ооруканада жатышат, үчөөнүн тең абалы канааттандырарлык.
21-мартта дагы Сузактын беш, Баткендин бир тургунунан COVID-19 аныкталды.