БИШКЕК, 20-мар. – Sputnik. Нарын облусунда коронавирус боюнча эпидемиологиялык кырдаалды жөнгө салуу жана анын алдын алуу максатында аталган аймакка кирүүчү жолдордо өткөрүү пунктулары иштеп жатат. Бул туурасында облустук милициядан кабарлашты.
Тагыраагы, блок-посттор Нарын облусуна кирүүчү төмөнкү аймактарга коюлду:
- Кочкор районунун Кочкор айыл аймагындагы Сары-Чат;
- Жумгал районунун Арал айыл аймагындагы Сары-Камыш;
- Ак-Талаа районунун Ак-Тал айыл аймагындагы Ак-Тал-Чат участоктору.
"Ар бир постто Нарын облусундагы ички иштер органдарынын экиден кызматкери күнү-түнү кезметке туруп иштеп жатат. Андан сырткары, райондук мамлекеттик администрациясынын, Санитардык-эпидемиологиялык көзөмөл борборунун өкүлү жана медицина кызматкерлери да бар", — деп айтылган маалыматта.
Бул иш-чаралар коронавирус илдетинин аймакка кирип жана жайылып кетишин алдын алуу, ошондой эле коомдук тартипти, коопсуздукту камсыз кылуу максатында жасалып жатканын айтышты.
Буга чейин Нарын облусунда кичи ажылыкка барып келген эки жана алар менен байланышта болгон төрт жарандын карантинге алынганы кабарланган.
Кыргызстандагы коронавирус
Ал эми бүгүн, 20-мартта, умрага барып келген дагы үч адамдан COVID-19 табылганы маалым болду. Алар Ош облусуна караштуу Ноокат районунун тургундары. Учурда аймактык ооруканада жатышат, үчөөнүн тең абалы канааттандырарлык.
Түзүлгөн кырдаалга байланыштуу Сузак жана Ноокат райондоруна өзгөчө кырдаал киргизилди.
Кыргызстанда коронавируска байланышкан бардык маалыматтарды биздин тексттик трансляциядан окуп туруңуздар.