БИШКЕК, 20-мар. — Sputnik. Бишкекте биринчи жолу өткөн суткада ичеги-карын инфекциясына кабылгандар катталган жок. Бул тууралуу Бишкек шаардык Тез жардам кызматынын реанимация бөлүмүнүн жетекчиси Егор Борисов Twitter баракчасына жазды.
"Болгону эл колун жууп баштады...", — деди медик.
Медиктин посту соцтармакта популярдуу болуп жатат. Бир сааттын ичинде эле миңден ашык "лайк" топтоп 200 ретвит болду.
Колду бат-бат жууп туруу инфекцияны профилактика кылуунун бир жолу. Коронавирус пандемиясынан улам дүйнөдө жана Кыргызстанда колду жууп туруу эң зарыл нерселердин бири болуп калды.
Кыргызстандагы коронавирус
Ал эми бүгүн, 20-мартта, умрага барып келген дагы үч адамдан COVID-19 табылганы маалым болду. Алар Ош облусуна караштуу Ноокат районунун тургундары. Учурда аймактык ооруканада жатышат, үчөөнүн тең абалы канааттандырарлык.
Түзүлгөн кырдаалга байланыштуу Сузак жана Ноокат райондоруна өзгөчө кырдаал киргизилди.
Кыргызстанда коронавируска байланышкан бардык маалыматтарды биздин тексттик трансляциядан окуп туруңуздар.