Ошто унга кезекке тургандар көп. Айрымдары ала албай нааразы болууда

Бүгүн шаардын Манас-Ата кичи районундагы "Тулпар" ун комбинатынын алдына 200дөн ашык киши ун алууга чогулган. Кезекке тургандардын саны улам өсүп, акыры алар дүрбөлөңгө түшө баштаган.
Sputnik

БИШКЕК, 18-мар. — Sputnik. Ош шаарында ун алууга кезек күткөндөрдүн саны көп. Айрымдары ала албай убара. Бул тууралуу аймактык кабарчы маалымдады.

Анын айтымында, бүгүн шаардын Манас-Ата кичи районундагы "Тулпар" ун комбинатынын алдына 200дөн ашык киши ун алууга чогулган. Кезекке тургандардын саны улам өсүп, акыры алар дүрбөлөңгө түшө баштаган.

"Чогулгандардын саны көбөйүп ызы-чуу жаралгандыктан, шаар жетекчилиги унду КамАЗга жүктөп, шаардын борбордук базарына жөнөткөн. Чогулгандарды таратуу максатында элге унду ошол жактан алуу айтылган. Бирок кезекке тургандардын айрымдары таңдан бери кезекте турганын, Өзгөндө ун калбай калгандыктан Ош шаарына келгенин айтып, комбинаттын жанынан кетпей коюшкан. Учурда абалды милиция жөнгө салып жатат. Чогулгандар тарады", — деди аймактык кабарчы.

Ош шаарында "Тулпар" ун комбинатынын бир кап уну 1350 сомдон, ал эми Казакстандын "Наубай" аттуу унунун бир кабы 1500 сомдон сатылууда.