БИШКЕК, 17-мар. — Sputnik. Еврокомиссия четөлкөлүктөрдү 30 күнгө чейин Евробиримдиктеги мамлекеттерге кирүүгө чектөө кое турууну сунуштады. Бул тууралуу Еврокомиссиянын президенти Урсула фон дер Ляйендин айтканына таянып РИА Новости кабарлады.
Урсула фон дер Ляйен мындай билдирүүсүн Twitter баракчасына жазган.
"Еврокомиссия Евробиримдиктин курамындагы өлкөлөргө сырттан келгендерди убактылуу киргизбей турууну сунуштайт", — деген ал.
Финляндиянын премьер-министри Санна Марин чек арасын жабууга даяр экенин билдирди. Коюлган чектөө өлкөсүнө кайткан финндерге, Финляндияда жашап-иштеп жаткандарга тиешелүү эмес. Helsingin Sanomat басылмасы чек ара 13-апрелге чейин жабык болорун маалымдаган.
"Чек араларда тез арада 10 күнгө көзөмөл киргизилип, андан кийин ал мөөнөт эки айга чейин узартылышы мүмкүн", — деди ЕК президенти.
Еврокомиссия жакында эле Евробиримдиктен тышкаркы мамлекеттерге медициналык товарларды экспорттоодо жаңы эреже киргизген. Ага ылайык, медициналык бет кап, кол кап, коргоо кийимин экспорттош үчүн өкмөттөн атайын уруксат алышы керек.
Ушул эле учурда Евробиримдиктин ичинде медициналык товарлар эркин эле экспорттоло берет.