БИШКЕК, 16-мар. — Sputnik. Польшалык мушкер кыз Жоанна Енджейчик UFC 248 турниринде кытайлык чемпион Вэйли Чжан менен беттешкенден кийинки жүзүн биринчи жолу көрсөттү.
Видеосу социалдык тармактарга жарыяланган.
8-мартта болгон беттеште кыздар ММА тарыхындагы эң кызуу кандуу беттештердин бирин тартуулашты. Анда мушкерлер бири-бирине соккуларды көп узаткандыктан беттери шишип кеткен. Бөтөнчө Енджейчиктин чекеси дөмпөйүп калган.
"Мен Польшада үйүмдөмүн. Бетимде жана төшүмдө көгөргөн жерлерим көп. Шишиктер аздан тарап жатат, өзүмдү жакшы сезип калдым", — деген Енджейчик.
Ошондой эле спортчу көчөдө эжеси менен түшкөн сүрөтүн жүктөгөн. Ал көз айнек тагынып, кепка кийгендигине карабай беттериндеги көктөрү даана байкалып турганын көрүүгө болот.
Лас-Вегаста өткөн UFC 248 турниринде Енджейчик кытайлык Чжанга калыстардын чечими менен утулуп, чемпиондук кур тагына алган эмес.
Белгилей кетсек, Енджейчик кыргызстандык мушкер Валентина Шевченконун мурдагы атаандашы. Шевченко польшалык спортчуну 2018-жылы уткандан кийин UFC уюмунун жеңил салмактагы чемпиону болгон.