БИШКЕК, 16-мар. — Sputnik. Бүгүн эртең менентен баштап Казакстанда коронавируска байланыштуу өзгөчө кырдаал режими күчүнө кирди. Ал 2020-жылдын 15-апрелине чейин созуларын Sputnik Казакстан агенттиги жазды.
"Дүйнөлүк саламаттык сактоо уюмунун коронавирусту пандемия деп жарыялашынан улам казакстандыктардын ден соолугуна жана өмүрүнө коркунуч келбесин деген максатта өзгөчө кырдаал жарыяланды", — деп жазылат макалада.
Ошентип бүгүнтөн тарта коомдук жайларда тартипти сактоого өзгөчө көңүл бурула баштайт. Соода борборлору, кинотеатр, театр, көргөзмөлөр сыяктуу эл көп чогулган жайлар ишин токтотту. Болгону азык-түлүк дүкөндөрү жана базарлардын айрым жерлери адаттагыдай иштей берет.
Мындан тышкары, өзгөчө шаан-шөкөт менен өтчү спорттук иш-чаралар, тойлор, салтанаттар толугу менен токтотулду.
Эске салсак, 13-март күнү медиктер коронавирус жуктуруп алган алгачкы учурду аныкташкан. Учурда коңшу өлкөдө вирус жуктургандардын саны тогузга жетти, алардын арасында 12 жаштагы кыз бар.