БИШКЕК, 15-мар. — Sputnik. Өзбекстанда алгачкы жолу коронавирус жуктуруп алган адам катталды. Бул туурасында Sputnik Өзбекстан Санитардык-эпидемиологиялык агенттикке шилтеме берип жазды.
Анализдер жакында эле Франциядан келген жарандан алынган. Бүгүн саат 6.00дө тесттин жыйынтыгы вирус бар экендигин көрсөткөн.
Учурда Өзбекстандын бийлиги ооруну өлкөгө жайылтпоо үчүн чараларды күчөткөнү айтылды.
Бул Борбор Азия мамлекеттеринде коронавирус катталган экинчи учур. Буга чейин Казакстанда катталып, ал жакта ушул тапта алты адам вирус менен күрөшүп жатат.
Саламаттык сактоо министрлигинин айтымында, Кыргызстанда коронавирус жуктуруп алган учур жок.