БИШКЕК, 7-мар. — Sputnik. Былтыркы жылдан бери Москвада изделип жаткан Кыргызстандын жараны өзүнүн өмүрүн кыйганы жакында эле белгилүү болгонун ИИМдин маалымат кызматы кабарлады.
ИИМдин Россиядагы өкүлчүлүгүнө декабрдын башында 45 жаштагы аял кайрылып, 43 жаштагы күйөөсүн таап берүүнү өтүнгөн. Ош облусунан барган киши соңку ирет былтыркы жылдын август айында байланышка чыккан.
ИИМдин өкүлчүлүгү менен москвалык укук коргоо органдары тарабынан шаардын бардык жерлеринде издөө иштери жүргүзүлгөн. Ошондой эле өлүкканалардан окшош белгилери боюнча карашкан.
24-октябрда кыргызстандыктын сөөгү Москва облусунун М-4 "Дон" унаа жолунун 20-чакырымынан табылганы белгилүү болду. Тергөө иштеринин натыйжасында анын өз өмүрүн кыйганы аныкталган. Сөөгү соттук-медициналык экспертиза жүргүзүү үчүн өлүкканага жиберилип, андан кийин мамлекеттин эсебинен жерге беришкен.
5-мартта туугандары иштин материалдары менен таанышышкан. Эркек кишинин сөөгүн жерден каздырып, мекенине жиберүү пландалып жатканы айтылды.