БИШКЕК, 6-мар. — Sputnik. Бишкекке Түштүк Кореянын Сеул шаарынан Алматы аркылуу келген 21 кыргызстандык карантинге киргизилди. Бул тууралуу Саламаттык сактоо министрлигинен тастыкташты.
Sputnik Казакстан агенттигинин жазганына караганда, Сеул — Алматы каттамы менен жүргөн учак коронавирус күч алган Түштүк Корядан 5-март күнү 197 кишини алып келген. Алардын ичинде казакстандыктардан тышкары Кыргызстан, Өзбекстан, Россия, Тажикстан жана Украинанын жарандары бар.
"Кыргыз тарап милиционерлердин коштоосунда атайын автобус жиберип, 21 кыргызстандык мекенине жөнөтүлдү", — деп жазылат макалада.
Эске салсак, ушул тапта Кыргызстанга Кытай, Иран, Япония, Түштүк Корея жана Италиянын жарандарынын киришине чектөө коюлган. Бул мамлекеттерден келген кыргыз жарандары эки апталык карантинден өтүүгө милдеттүү.
Акыркы маалыматтарга караганда, Түштүк Кореяда COVID-19 коронавирусун жуктуруп алгандардын саны 6284 кишиге жетти. Алардын ичинен 40ы көз жумуп, 135и сакайып кетти.