БИШКЕК, 6-мар. — Sputnik. Россиянын auction деп аталган интернет-аукционунда 500 сомдук купюра сатууга коюлду.
Ал 2000-жылы жүгүртүүгө алгачкы ирет чыгарылган үлгүдөгү акча экени айтылат.
Баштапкы суммасы 40 миң рублди (42,2 миң сом) түздү. Бул өз баасынан дээрлик 80 эсе кымбат сатылып жатканын түшүндүрөт. Банкнотанын баалуулугу анын АА0000000 деген номеринде.
Белгилей кетсек, купюрага "Үлгү" деген мөөр коюлган. Ал банк кызматкерлерине, элге жана уюмдарга жаңы банкнотаны тааныштыруу максатында чыгарылган.
Ачык булактарда жалаң нөл менен жазылган номердеги ар кандай валютадагы купюралар сатууга чыкпай, үлгү катары гана колдонулары жазылган.