Бишкекте адам өлтүрүүгө шектелип уюшкан кылмыштуу топтун мүчөсү кармалды. Бул тууралуу Чүй ОИИББден билдиришти.
2015-жылдын май айында Кара-Балта шаардык ооруканасына 25 жаштагы кишинин сөөгү алынып келген. Анын денесинде кыйнап өлтүрүлгөнүн далилдеген белгилер болгон. Милиция Кылмыш-жаза кодексинин "Адам өлтүрүү" беренеси боюнча иш козгоп, 30 жаштагы шектүүгө издөө жарыялаган.
Натыйжада шектүү беш жылдан кийин, 2020-жылдын 3-мартында Бишкектин көчөлөрүнүн биринен кармалды. Тергөө амалдары уланууда.