Свердлов райондук администрациясына жыл сайын 1 миллиард сомдон ашык акча бөлүнүп, анын 60 пайызы билим берүү менен аз камсыз болгон үй-бүлөлөргө социалдык көмөк көрсөтүүгө жумшалат. Бул тууралуу Мурат Осмонов Sputnik Кыргызстан радиосунун "Ачык кеп" программасында маек куруп жатып билдирди.
Анын айтымында, аз камсыз болгон үй-бүлөлөргө 24 багыт боюнча социалдык көмөк көрсөтүлөт.
"Бүгүнкү күндө район боюнча 13 162 тургун социалдык паспортко ээ. Бул документ майып адамдарга, каралашар адамы жок пенсионерлерге жана аз камсыз болгон үй-бүлөлөргө берилет. Социалдык паспорту бар тургундар 24 багытта колдоого ээ болушат. Мисалы, ар бир квартал сайын, жылына төрт жолу бериле турган 600 сомдук стипендиялар бар. Айрым жашоочуларыбызга ай сайын 2000 сомдон жөлөк пул берилип турат. Ошондой эле көмүргө деп 2500 сом бөлүнөт же бир тонна көмүр түшүрүп беребиз. Андан сырткары, социалдык паспорту бар улгайган тургундарыбызга кийме тиш (протез) жасатып берүүгө каражат бөлүнөт. Буга ылайык атайын прейскурант бар, ошого жараша төлөмдөр берилип турат. Бирок бул жерде белгилей кетчү жагдай, аталган социалдык колдоолор Бишкек шаарында катталган гана жарандарга каралган. Мындан сырткары, жыл сайын комиссия түзүлүп, мониторинг жүрүп турат, ага ылайык социалдык паспорту бар тургундардын жашоо шарты жакшырса социалдык төлөмдөр токтотулат", — деди Осмонов.
Аким өлкөнү санариптештирүү багытында жүрүп жаткан иштердин алкагында былтыркы жылдан тарта Свердлов районундагы аз камсыз болгон үй-бүлөлөрдүн социалдык паспорттору электрондоштурулганын да кошумчалады.