БИШКЕК, 28-фев. — Sputnik. Кыргызстандагы кесиптик бирликтердин (Профсоюз) иши боюнча 17 кылмыш иши козголгон. Бул туурасында профсоюздардын ишмердүүлүгүн иликтөө боюнча түзүлгөн депутаттык комиссиянын жыйынында Башкы прокуратуранын ыкчам издөө жана тергөө иштерин көзөмөлдөө боюнча башкармалыктын жетекчисинин орун басары Жыргал Исмаилов билдирди.
Анын айтымында, материалдык баалуулуктарды жок кылуу, эс алууга жолдомону арзан же кымбат берүү, мамлекеттик мүлктөрдү, жерлерди сатуу боюнча иш ачылган.
"2018-жылдан ушул күнгө чейин профсоюзчуларга 17 кылмыш иши козголгон. Учурда көп иштерге экспертиза корутунду чыгарып бүтө электигине байланыштуу чечим кабыл алына элек. Айрымдары Финполицияга өткөрүп берилди. Мындан тышкары, төрт иште кылмыштын курамы жок деп токтотулган", — деди Исамилов.
Башкы прокуратуранын өкүлүнүн берген маалыматы депутаттарды канааттандырган жок. Эл өкүлү Кожобек Рыспаев архивдеги статистиканы эле алып келбей, көрүлгөн чаралар тууралуу айтып беришин талап кылды.
"Сиз айткан маалыматтарды биз деле билебиз. Мурдагы жыйында ошону текшерип бергиле деп айтканбыз. Көз карандысыз башкаруудагы уюм деп кайрылууларды карабай коёт экенсиңер. Бирок алар мамлекеттин мүлкүн арзыбаган акчага сатып, бөлүп алып жатпайбы. Эки-үч батирлүү болуп, Lexus унааларын айдап жүрүшөт. Акчаны каяктан таап жатат алар? Дүйшөнбек Зилалиевди мыйзамсыз байыган деп камап койдуңар го. Буларды эмнеге текшербейсиңер?" — деп ачууланды Рыспаев.
Буга чейин депутаттар Кесиптик бирликтердин укуктарын кайрадан ыраатташтыруу үчүн мыйзам долбоорун сунуштап, экинчи окуудан өткөн. Бирок Кесиптик бирликтердин федерация өкүлдөрү мыйзам долбооруна каршы чыккан. Бул мыйзам талкууга түшкөндүктөн талдоо үчүн атайын комиссия түзүлгөн.
Аталган мыйзамга 1998-жылдан бери өзгөртүү киргизиле элек. Сунушталган долбоор кызматкерлердин жаш курагын 65тен ашырбоо, чогулган каражаттын ачык-айкындуулугун камсыздоого жана мамлекет тарабынан көзөмөлдү күчөтүүгө багытталган.