БИШКЕК, 24-фев. — Sputnik. Кытай бийлиги жакын арада коронавирус илдети ооздукталарына ишенип турат. Бул туурасында Кытайдын Россиядагы элчиси Чжан Ханьхуэй Москвадагы маалымат жыйында билдиргенин РИА Новости жазды.
Дипломаттын айтымында, кытайлык окумуштуулар коронавирустан айыктырчу вакцинаны иштеп чыгышкан, бирок аны толугу менен изилдеп чыгуу керек болуп жатат.
"Эпидемиянын очогунан (Хубэй провинциясы. — ред.) башка аймактарда жашоо ушул айдын аягына чейин мурдагы калыбына келерин божомолдоп жатабыз. Көптөгөн провинция жана шаарларда 18 күндөн бери ооруну жуктургандар азайганы байкалууда", — деди Ханьхуэй.
Элчи ошондой эле "вирусту Кытай атайылап чыгарган" деп тарап жаткан кепти четке каккан.
Коронавирус тууралуу
Кыргызстан Кытай менен менен чектешкен чек арасын жаап, аба каттамын токтоткон. Республика боюнча коронавируска кабылгандар жок.
Соңку маалыматтарга караганда, дүйнө боюнча вирустан 2 626 киши көз жумуп, жуктургандардын саны 79 миңге жетти. Ошол эле учурда 25 миңден ашуун адам айыкканы белгилүү болду.