БИШКЕК, 21-фев. — Sputnik. АКШнын президенти Дональд Трамп Түштүк Кореянын "Мителер" тасмасына "Оскар" сыйлыгынын "Жылдын мыкты фильми" байгеси берилгенине нааразы болду. Бул тууралуу РИА новости жазды.
Мамлекет башчысы мындай чечимди сынга алып, АКШнын Түштүк Корея менен соода-сатык жаатында көйгөйү көп экенин белгилеген.
"Эмне балээ болуп жатат? Түштүк Корея менен соода жаатында жетиштүү көйгөйлөрүбүз бар. Эми аларга "Жылдын мыкты фильми" сыйлыгы берилип жатат. Бул өзү кандай? Бул кино "чет элдик мыкты тасма" сыйлыгын алат деп ойлогом. Жок, мурда деги ушундай болду беле?", — деп Трамп Колорадо штатындагы митингде сүйлөгөн.
Белгилей кетсек, түштүк кореялык режиссёр Пон Чжун Хонун "Мителер" деген тасмасы "Оскар" сыйлыгынын "Жылдын мыкты тасмасы" номинациясын алган. Тарыхта биринчи жолу чет элдик кино бул номинацияны жеңип алды.