БИШКЕК, 15-фев. — Sputnik. Мындан 14 күн мурда Кытайдан алып келинген 18 студенттин карантиндик мөөнөтү аяктап, бүгүн үйүнө чыгарылды. Бул тууралуу Саламаттыкты сактоо министрлигинен билдиришти.
"Бардык студенттер 2-февраль күнү аэропорттогу кароодон өткөндөн кийин Бишкектин четиндеги карантин аймагына жеткирилген. Бардыгы тиешелүү анализдерди тапшырып, таза чыкты", — деп айтылат билдирүүдө.
Карантин учурунда алар менен бир гана медициналык кызматкерлер байланышта болгон.
Эске салсак, 2-февраль күнү Кытайдын Ухань шаарында окуган кыргызстандык 18 студент атайын борт менен Нур-Султан шаары аркылуу Бишкекке алып келинген. Алар аэропорттон тиешелүү текшерүүдөн өткөн соң Бишкектин чет жакасындагы оорукананын атайын каралган бөлүмүнө жаткырылып, дарыгерлердин тыкыр көзөмөлүн алынган.
Буга чейин Кытайдын Саламаттыкты сактоо маселелерин караган мамлекеттик комитетинин эксперттик комиссиясы жүргүзгөн изилдөөнүн көчүрмөсү интернетке тарап кеткен. Анда коронавирустун инкубациялык мөөнөтү мурда айтылгандай 14 эмес, 24 күнгө созулушу мүмкүн экени айтылган. Бирок бул боюнча Дүйнөлүк саламаттык сактоо уюму расмий үн ката элек.