БИШКЕК, 15-фев. — Sputnik. Францияда саякаттап жүргөн кытайлык турист кемпир коронавирустан көз жумду. Бул туурасында BBC жазган.
Франциянын Саламаттыкты сактоо министрлигинин маалыматына караганда, Хубэйден 16-январда келген 80 жаштагы кемпир көп өтпөй эле, 25-январда карантинге алынган.
Буга чейин Кытайдан сырткаркы аймакта адамдар бүгүнкү күнгө чейин үч мамлекетте — Гонконгдо, Филиппинде жана Японияда көз жумган.
Кытайдагы коронавирустан бүгүнкү күнгө чейин 1 527 киши каза таап, 8 567си айыгып кеткен. Ал эми оору козгогучту жуктургандардын саны 67 миң экендиги айтылды.
Коронавирус тууралуу
Бул кырдаалдан чочулаган Кыргызстан Кытай менен чек арасын жаап, авиакаттамдарын токтоткон. 2-февралда Ухань шаарынан 18 студент Казакстан аркылуу Кыргызстанга жеткирилген. Бүгүн Саламаттыкты сактоо министрлиги алардын анализдери таза чыккандыктан, карантинде жаткандар үйлөрүнө жиберилгендигин кабарлады.