БИШКЕК, 15-фев. — Sputnik. Мамлекеттик салык кызматында жетекчи Кабыл Абдалиевдин чечими менен кадрдык ротация жүргүзүлдү. Бул тууралуу ведомствонун маалымат катчылыгы кабарлады.
Аталган кызматтын Ош облусу боюнча башкармалыгынын жетекчиси Эрмекбай Чоюнов ишинен бошотулуп, Жалал-Абад облусу боюнча башкармалыктын жетекчиси болуп дайындалды.
Бош калган орунга жетекчи тандоо үчүн сынак жарыяланганга чейин ушул эле башкармалыктын бөлүм жетекчиси Рахманберди Аданов башкарып турмай болду.
Ал эми Жалал-Абад облусу боюнча башкармалыктын мурдагы жетекчиси Каныбек Ормонов Бишкек шаарындагы Октябрь райондук бөлүмүнүн башчылыгына которулду.
Ал райондун башкармалыгынын жетекчиси Салык кызматынын борбордук аппаратына бөлүм башчы болуп дайындалды.
Салык кызматынан билдиришкендей, ротациянын негизги максаты — башкаруу ишмердүүлүгүн оптимизациялоо жана салык органдарынын ишинин натыйжасын арттыруу.