БИШКЕК, 14-фев. — Sputnik. Балдарга карата катаал мамилени жана зордук-зомбулукту алдын алуу максатында адистер үйлөрдү кыдырууда. Бул тууралуу өкмөттөн билдиришти.
Райондук штабдардын мүчөлөрү айрыкча мигранттардын балдары тарбияланып жаткан үй-бүлөлөргө мониторинг жүргүзүүдө. Ошондой эле балдарга карата катаал мамиле кылууга жол бербөө максатында түшүндүрүү иштери аткарылууда.
Буга чейин Ички иштер министрлигине балдарга зомбулук көрсөтүү учурларын өзгөчө көзөмөлгө алып, ар бир факт боюнча тыкыр тергөө жүргүзүп, күнөөлүүлөрдү мыйзам чегинде жоопкерчиликке тартуу тапшырмасы берилген.
Ошондой эле Эмгек жана социалдык өнүктүрүү министрлиги эл аралык өнөктөштөрдүн колдоосу менен жашоо-шарты оор балдардын автоматташтырылган маалымат базасын ишке киргизген.
Маалымат базасы жашоо-шарты оор балдарды ыкчам аныктап жана аларды коргоо үчүн тийиштүү чараларды көрүүнү шарттайт.