БИШКЕК, 8-фев. — Sputnik. Борбордук шайлоо комиссиясынын төрайымы Нуржан Шайлдабекова Москва шаары менен Москва облусундагы кыргыз диаспора өкүлдөрү менен жолукту. Бул тууралуу Кыргызстандын Россиядагы элчилигинин маалымат кызматынан кабарлашты.
Билдирүүгө ылайык, аталган иш-чарага Кыргызстандын элчиси Аликбек Жекшенкулов, Тышкы иштер министрлигинин, Мамлекеттик каттоо кызматынын, "Инфоком" мамлекеттик ишканасынын өкүлдөрү, Россиядагы КРдин Ички иштер министрлиги менен Мамлекеттик миграция кызматынын өкүлчүлүктөрүнүн жана элчиликтин адистери катышкан.
Анда РФ аймагындагы КР жарандарына ушул жылдын 4-октябрына пландалган Жогорку Кеңештин депутаттарын шайлоого көрүлүп жаткан даярдыктар жана шайлоо мыйзамындагы өзгөртүүлөр жөнүндө маалымат берилген.
Борбордук шайлоо комиссиянын төрайымы Нуржан Шайлдабекова чет жактагы мекендештердин суроолоруна дагы жооп берген.