БИШКЕК, 8-фев. — Sputnik. Бишкекте чет элдик жаранга өздөрүн милиционермин деп тааныштырып, акча талап кылган эки киши кармалды. Бул тууралуу ИИМдин маалымат кызматынан билдиришти.
3-февралда ИИМдин ички иликтөө кызматына Түштүк Кореянын жараны кайрылган. Анын айтымында, өздөрүн милиционермин деп тааныштырган адамдар андан 8 миң доллар талап кылышкан.
Аталган факты Кылмыш жана жоруктардын бирдиктүү реестрине каттоого алынган.
"7-февралда талап кылынган сумманын 2 миң долларын алып жаткан жеринен эки жаран кармалды. Саат 21:30да ИИМдин ички иликтөө кызматы менен тергөө кызматы атайын операция жүргүзгөн", — деп айтылат маалыматта.
Натыйжада алар Бишкектин тургундары экендиги белгилүү болгон.
"Болжолдуу маалыматтар боюнча, шектүүлөр чет элдикке өздөрүн милиционер катары тааныштырып, кызмат көрсөткөндүгү үчүн акча сурашкан", — деп айтылат билдирмеде.
Кармалгандар убактылуу кармоо жайына киргизилген. Учурда алардын баш коргоо чарасы тандалып жатат.