БИШКЕК, 8-фев. — Sputnik. Кардарды сабап өлтүргөн "Айчүрөк" дүр-дүйнө дүкөнүнүн сатуучусун 7 жылга эркинен ажыраткан өкүм чыгарды. Бул тууралуу Жогорку соттун расмий сайтында кабарланды.
Окуя 2018-жылдын 29-августунда болгон.
Өкүмгө ылайык, буга чейин соттолбогон 27 жаштагы жаран 47 жаштагы эркекти бир нече жолу башка уруп, бир жолу тээп жиберген. Жабырлануучу алган жаракатынан эсине келбей каза болгон.
Сот отурумунда айыпталуучу кылганын жарым-жартылай мойнуна алып, төмөндөгүдөй көрсөтмө берген.
"Мен өзүм ЦУМда телефон оңдоп иштейм. Окуя болгон күнү ал адам мага кытай өндүрүшүндөгү эки телефонду оңдоп бер деп келген. Мен ага аны оңдоо кымбат болуп калат десем, ал бир телефонун кубаттап берчи деп калды. Мен ылдый жакта аны коюп жатып бир телефонумду алып жатканын көрүп калдым. Сатыкта турган телефонду бер десем, ал мага өзүнүн эски уюлдук аппаратын алып чыккан. Берки телефонду баштыгынан тапканда ызаланып эки жолу башка чаап, бир жолу тээп жибергем. Ал жерге Тез жардам кызматы бир сааттан кийин келди. Анын каза болгонун угуп өзүм Свердлов РИИБине барып кызматкерлерге болгон окуяны айткам. Көз жумган киши мас болчу, сөгүнүп жаткан, ошого ачуум келди. Жабырлануучуну сабагам, бирок аны өлтүрүү оюмда болгон эмес", — деген айтыпталуучу.
Каза болгон жарандын артында келинчеги жана кичинекей кызы калган.