БИШКЕК, 5-фев. — Sputnik. Чет өлкөдөн келген 347 киши дарыгерлердин көзөмөлүндө болуп жатат. Бул тууралуу Sputnik агенттигине Саламаттыкты сактоо министрлигинен билдиришти.
Дүйнөлүк саламаттыкты сактоо уюмунун сунушуна ылайык, күмөн санаткан өлкөлөрдөн келгендердин баары толук текшерүүдөн өтүшү шарт. Аларды дарыгерлер оору жуктурган жок деп тапкан күндө дагы кийин үй-бүлөлүк дарыгерлер борборунун көзөмөлүндө турушу керек.
5-февралга карата маалымат боюнча, Кыргызстандын аймагында коронавирус жуктурган адам жок. Тиешелүү ооруканалар илдеттин белгиси пайда болгондорду кабыл алууга толугу менен даяр, алар үчүн 280 орун камдалган. Медициналык персонал окуудан өткөн.
Эпидемиологиялык кырдаал түзүлгөн өлкөлөрдөн келгендер текшерүүдөн өтүп жатат. Кытайдан КРВИ жана грипп белгилери менен келгендер ооруканада өзүнчө бөлүмдө дарыланууда.