БИШКЕК, 31-янв. — Sputnik. Кыргызстандын Тышкы иштер министрлиги менен КРдин Кытайдагы элчилиги Ухань шаарындагы мекендештерди алып келүү маселесин карап жатат. Бул туурасында ТИМдин маалымат кызматынан билдиришти.
"Ошол эле учурда министрлик Кытайда коронавирус коркунучу жөнгө салынмайынча ал жакка барбай турууну сунуштайт", — деп айтылат маалыматта.
ТИМ Кытайда жүргөн кыргызстандыктардан дайын-дарегин жана телефон номерлерин билдирип коюуну өтүнөт.
Кытай бийлиги 2019-жылдын 31-декабрында Дүйнөлүк саламаттык сактоо уюмуна өлкөнүн борбордук бөлүгү Ухань шаарында белгисиз пневмония оорусу күч алганын билдирген. Адистер оорунун козгогучу коронавирус 2019-nCoV экендигин аныктаган.
Соңку маалыматтар боюнча, оорудан 170 адам каза тапты.
Коронавирус Кытайдан тышкары Түштүк Корея, Камбоджа, БАЭ, Япония, АКШ, Таиланд, Канада, Вьетнам, Сингапур, Непал, Франция, Австралия, Малайзия, Германия жана Шри-Ланкага жетти.