БИШКЕК, 31-янв. — Sputnik. Ишин так аткарбаганы үчүн прокуратуранын 27 кызматкерин жана жетекчисин тартиптик жоопкерчиликке тартуу сунушталды. Бул туурасында Башкы көзөмөл органынын маалымат кызматы билдирди.
Бүгүн, 31-январда, башкы прокурор Өткүрбек Жамшитовдун төрагалыгы алдында кеңейтилген коллегиянын отуруму өттү.
"Прокуратура органдарынын кызматкерлеринин кадыр-баркына шек келтиргендердин этикалык жана тартип жоопкерчилигин кароо маселеси кызуу талкууланды. Жыйындын аягында тиешелүү буйруктарды так аткарбаган жана мыйзамсыз иштерге чабал көзөмөл жүргүзгөн 30дай кызматкер менен жетекчиге тартиптик чара колдонуу сунушталды", — деп жазылат маалыматта.
Жыйындын алкагында былтыр прокурордук чара көрүү актыларынын негизинде мамлекетти зыянга учураткан 1 миллиард 79,5 миллион сом өндүрүлгөнү кошумчаланды.