БИШКЕК, 23-янв. — Sputnik. Россиянын Челябинск облусунда КамАЗ менен жеңил унаа кагышып, беш киши көз жумганын жергиликтүү ЖМКлар жазды.
Басылманын маалыматына караганда, жеңил унаадагы беш киши кыргызстандыктар болушу ыктымал. Анткени автоунаа KG номерлүү экени айтылат.
Окуя кечээ, 22-январь күнү, Бишкек убактысы менен саат 20.50дө Челябинск — Троицк жолунун 107-чакырымында болгон.
Күбөлөрдүн айтымында, Honda алдыда бара жаткан жүк ташуучу унааны озуп өтүүнү көздөп, каршы тилкеде келе жаткан КамАЗды байкабай калган.
Жыйынтыгында жеңил унаадагы беш эркек каза тапкан. Ал эми КамАЗдын 33 жаштагы айдоочусу эч кандай жаракат алган эмес.
Аталган факты боюнча иликтөө иштери башталды.
Кыргызстандын Россиядагы элчилигинен алдын ала маалыматтарга таянып билдиришкенине караганда, каза болгондордун бардыгы Кыргызстандын жарандары. Учурда маселе элчиликтин көзөмөлүндө.