БИШКЕК, 21-янв. — Sputnik. Бишкек жана Кара-Балта шаарларынын ортосундагы жолдо маршрутка менен жеңил унаа кагышты. Бул туурасында Sputnik Кыргызстан агенттигине Жол кыймылы коопсуздугун камсыздоо боюнча башкы башкармалыктын Чүй облустук бөлүмүнөн кабарлашты.
Кырсык 21-январда болжол менен эртең мененки саат 6:30дар чамасында болгон. Сокулук районунан чыккан Honda Accord Бишкекти көздөй келе жатып, Mercedes Sprinter кичи автобусу менен кагышкан. Экинчи автокөлүктүн Бишкектен Кара-Балтаны көздөй бара жатканы айтылды.
"Үч адам каза таап, кеминде бешөө жарадар болду. Алдын ала берилген маалымат боюнча, Honda Accord автоунаасынын айдоочусу уктап кеткен", — деп билдиришти милициядан.
Учурда тергөө иштери башталды.