БИШКЕК, 20-янв. — Sputnik. Америкалык белгилүү мушкер Нэйт Диас Конор Макгрегор менен Дональд Серроне "сүйлөшүп алып шоу кылышты" деген айыптоосун Twitter баракчасына жазды.
Белгилей кетсек, жекшемби күнү, 19-январда, Лас-Вегастагы UFC 246 турниринде Конор Макгрегор биринчи раунддун 40-секундасында Серронени техникалык нокаут менен жеңип алган.
Ирландиялык мушкер бул беттеши үчүн турнирдин уюштуруучуларынан 50 миң доллар алган.
Ал эми Диас негизги беттештин жыйынтыгынан шек санап жатканын айтып, мушкерлер алдын ала сүйлөшүп алганын кыйытты.
"Мунун баары жалган. Жасалма!" — деди 34 жаштагы америкалык мушкер.
Аталган билдирүү бир нече саатта эле 40 миң "лайк" алып, сегиз миң жолу бөлүшүлдү. Көптөр Диастын пикирин колдоп жатышат.