БИШКЕК, 18-янв. — Sputnik. Бишкекте балдардын коопсуздугу жана ата-энелердин көзөмөлү үчүн түзүлгөн "Окуучунун коопсуздугу" мобилдик колдонмосу чыкканын шаардык муниципалитеттин маалымат кызматы билдирди.
Бет ачар №24 мектепте өттү. Мэриянын санариптик технологиялар борборунун адистери ата-энелерге жаңы электрондук колдонмо тууралуу айтып берип, анын иштешин көрсөтүштү.
Кийинчерээк долбоорго окуучунун мектепте кандай окуп жатканын карап турган "Электрондук күндөлүк" программасын жана электрондук билеттештирүү боюнча баланын коомдук транспортко качан отуруп, канчада чыккандыгын көрсөтүүчү "Тулпар" колдонмосун киргизүү пландалууда. Программага ШИИБ, Билим берүү башкармалыгы, Бишкектин шашылыш жардам көрсөтүү кызматы да киргизилери айтылды.
Колдонмонун бета-версиясы январдын аягында Android жана IOS смартфондорунун базасында жана смарт-сааттарда колдонууга берилет.