БИШКЕК, 17-янв. — Sputnik. Баткенде жарандар коммуналдык кызматка деп төлөгөн акчаны өзүнө ыйгарып алган кыргызстандык жаран Москвадан колго түштү. Бул тууралуу ИИМден билдиришти.
Маалыматка караганда, шектүү бир нече жылдан бери документтерди жасалмалоо жолу менен элден түшкөн акчаны өз чөнтөгүнө салып турган.
"2011-жылдан 2015-жылга чейин коммуналдык кызматта оператор-компьютерщик болуп эмгектенген Г.А. аттуу киши элден акча чогулткан контролёрлордун ишенимине кирип алып топтолгон акчаны алып турган. Ал материалдык пайда көрүү үчүн каражаттын жарымын мамлекетке төлөп, жарымын өзүнө алып, квитанцияга башка сумманы жазып коюп жүргөн. Үч жыл аралыгында ири материалдык чыгым тарттырган", — деп айтылат маалыматта.
Шектүүнү колго түшүрүү үчүн мамлекеттер аралык издөө жарыяланып, натыйжада Баткенде төрөлгөн 1980-жылкы Г.А. Москвадан табылган. Учурда аны жоопкерчиликке тартуу үчүн Кыргызстанга жөнөтүү маселеси каралып жатат.