Атама алгачкы аянды 10 жашында Бакай ата берген экен. Бул тууралуу Канат Мамбеталиев Sputnik Кыргызстан радиосуна маек берип жатып билдирди.
Анын айтымында, Уркаш Мамбеталиев Улуу Ата мекендик согуш жылдары 10 жашынан тарта манас айта баштаган.
"1944-жылы Карды-Жарык деген талаада атам Саты деген өзүнөн бир жаш улуу агасы менен мал жайып жүргөн экен. Экөө малдын эки жагын кайтарып жатканбыз дейт. Бир убакта уй сайгактап кетип, Саты атам тарапка барса, ал уктап жатат. Ойготуп көрсө турбай коёт. Агасы коркуп кетип, үйгө барып "Уркаш өлүп калды" деп кабар берет. Баланы ат менен алып келишет. Ал жерден үйдөгүлөр ыйлап киргенде чоң аталарыбыздын бири "тынчтангыла, жакшы жышаан болуп жатат. Баланын беттери кызарып, кымыз жыттанып турат" дептир. Үйгө киргизип жаткызса, атам тура калып, элдир-селдир манас айткандай болуп кайра жатып калат. Ошол жерден түлөө өткөрүлүп, бир-эки күндөн кийин эсине келип, манасчылык өнөрү ошол Карды-Жарыктан ачылган. Ал аян, түш алганда абдан кыйналчу. Болот деген агайынын эскерүүсүндө атам эпостогу Бакайдан аян алып, манас айтууну мыктылап өздөштүрүш үчүн бир жылдай мектепке да барбай койгон экен", — деди Мамбеталиев.
Ал ошондой эле Уркаш Мамбеталиев Саякбай Каралаевден эки жолу бата алганын кошумчалады.
Эскерте кетсек, акын жана манасчы көзү тирүү болгондо быйыл 86 жашка толмок.