БИШКЕК, 13-янв. — Sputnik. Финансы министрлиги январь айында 1,3 миллиард сомдук баалуу кагаздарды чыгарат. Бул туурасында ведомствонун маалымат кызматы кабарлады.
Билдирмеге караганда, анын ичинен 550 миллион сомдук мамлекеттик казыналык векселдерди (МКВ), 750 миллион сомдук мамлекеттик казыналык облигацияларды (МКО) чыгаруу пландалууда.
МКВнын алгачкы аукциону 9-январь күнү өткөн, бүгүнтөн тарта чыгарыла баштайт. МКОнун купондук чени 5 жана 7 пайызды түзөт. Жүгүртүү мөөнөтү — 3-7 жыл.
МКО — өкмөттүн пайыздык киреше (купондук) ала турган мамлекеттик узак мөөнөттүү баалуу кагаздары. Аны пайдалануу мөөнөтү бир жылдан жогору болот. Номиналдык наркы жана параметри чыгаруу учурунда Финансы министрлиги тарабынан аныкталат. Облигация документсиз жана документ түрүндө болот.
Баалуу кагаздардын эки түрү тең Улуттук банк тарабынан өткөрүлгөн аукциондор аркылуу жума сайын сатылып турат. Аукционго коммерциялык банктар, институционалдык инвесторлор жана "Борбордук депозитарий" ЖАКсы катышууга укуктуу. Юридикалык жактар жана жеке адамдар да ээлик кыла алат.