БИШКЕК, 12-янв. — Sputnik. Өткөн жылы Кыргызстандын мамлекеттик карызын тейлөөгө 28,1 миллион сом жумшалды. Бул тууралуу Финансы министрлигинен билдиришти.
"Тышкы карызга дээрлик 14 миллион сом кетсе, ички бересеге 14,1 миллион сом бөлүндү", — деп айтылат маалыматта.
Муну менен катар министрлик мамлекеттик карыз өз убагында жана толук көлөмдө жүргүзүлүп жатканын кошумчалады.
Ведомствонун сайтында мамлекеттик карыздын абалы боюнча 30-ноябрга карата гана маалымат берилген. Ага ылайык, өлкөнүн мамлекеттик карызы 4 миллиард 503 миллион АКШ долларын түздү. Сом менен эсептегенде 314 миллиард 567 миллион сом.
Мамлекеттик карыз — бул өлкөнүн насыялык макулдашуусу же башка карыздык милдеттенмелери боюнча ички жана тышкы карыздын жалпы суммасы.