Мамлекет эгемендүүлүктү алгандан баштап драматургияга көңүл бурулбай, калем акы төлөнбөй бир топ кыйынчылыктар болгон. Бул тууралуу Тыныбек Сыдыков Sputnik Кыргызстан радиосунун эфиринде маек куруп жатып билдирди.
Анын айтымында, драмалардын сынагына катыша турган чыгармалар 14-шрифтте жазылып, 21 беттен кем болбошу зарыл.
"2016-жылы жакшы жөрөлгө башталып, Тарых жана маданият жылына карата өзүнчө сынак өткөн, Үркүн жылына арналган конкурс болуп, ошол жылдары драматургдар жакшы пьесаларды жазып, бул тармак жандана баштаган. Кийин заманбап чыгармаларга сынак жарыяланды. Жаш калемгерлерге арналган семинар болуп өткөн. Алардын 80 пайызы драматургия менен алектене баштаган. Бул жолу Апрель революциясынын 10 жылдыгына карата драмалардын республикалык сынагы жарыяланды. Өкмөт иш-чараларды бекитти. Чоңдор жана жаш драматургдардын арасында сынак декабрь айында башталган. Чыгармалар 15-февралга чейин кабыл алынат. Негизги талап чагымчылдыкка жол бербеген, касташуу жаратпаган драмалар болушу керек. Жети кишиден турган калыстар тобу түзүлдү. Сынактын жеңүүчүлөрү 21-февралда аныкталат", — деди Сыдыков.
Ал сынакка 350 миң сом бөлүнүп, мыкты чыгармаларга орундар берилип, ага жараша акчалай сыйлык каралганын кошумчалады.