БИШКЕК, 10-янв. — Sputnik. АКШ конгрессинин палата өкүлдөрү бейшемби күнү президент Дональд Трамптын Иранга каршы аскерий аракеттерди көрүшү боюнча ыйгарым укуктарын чектөөгө добуш беришти. Бул туурасында РИА Новости жазды.
Тийиштүү резолюцияны палатанын көпчүлүк өкүлдөрү, тагыраагы, Трамптын каршылаштары болуп саналган демократтар партиясынын өкүлдөрү кабыл алган. Ага чейин палатанын спикери Нэнси Пелоси Иранга каршы аскерий аракеттер тынчсызданууну жаратып жатканын айтып, аткаруучу бийлик конгрессти тийиштүү деңгээлде маалымдар кылбай жатканын билдирген.
Кабыл алынган документтин мыйзамдуу күчү жок, сенат кабыл алган учурда деле президентке кол коюуга жиберилбейт. Бирок жогорку палатада документ жетиштүү добуш ала албай калышы мүмкүн, себеби ал жакта президенттин партиялаштары — республикачылар көп.
Мындайча айтканда, палатадагылар өзүнүн позициясын билдирди, иш жүзүндө Трамптын Иранга каршы аскерий аракеттерине тыюу салууга ыйгарым укугу жок.
Генералдын өлүмү жана өч алуу
Белгилей кетсек, жыл жаңырары менен АКШ Багдаддын аэропортуна жасаган ракеталык чабуулунан кийин Ислам революциясынын коргоочулар корпусунун генералы Касем Сулейманини жок кылган. Мындан кийин Иран генерал үчүн өч алууну убадалап, АКШга сокку уруунун 13 сценарийи бар экенин айткан. Ал эми Трамп америкалыктар чабуулга өтө турган болсо, Ирандын 52 объектисине сокку урарын билдирген.