БИШКЕК, 6-янв. — Sputnik. Ош шаарындагы көчөлөрдүн биринен табылган эки жашар кыздын ата-энеси бир жумадан бери изделүүдө. Бул туурасында Sputnik Кыргызстанга шаардык милициянын маалымат кызматынын жетекчиси Замир Сыдыков билдирди.
Бөбөктү 30-декабрга караган түнү саат 02.00дө Курманжан датка көчөсүндөгү көп кабаттуу үйдүн короосунан табышкан.
Ош: көчөдөн табылган 2 жашар кыздын ата-энеси бир жумадан бери изделүүдө
© Фото / пресс-служба УВД города Ош
"Учурда кыз балдар үйүндө жашап жатат. Абалы жакшы, балдар менен ойноп жатат, бирок сүйлөй албайт. Бир жумадан бери милиция анын ата-энесин издөөдө", — деди Сыдыков.
Аталган факт боюнча Жазык кодексинин 150-беренеси ("Кооптуу абалда калтыруу") менен сотко чейинки өндүрүш ачылды. Милиция бөбөк тууралуу кандайдыр бир маалымат билгендер болсо (03222) 4-82-82 номери аркылуу кабарлап коюуну суранат.