БИШКЕК, 3-янв. — Sputnik. Россиянын аймагында эмгектенген мигранттарды кызамыкка каршы эмдөөдөн өткөрүү иши 2020-жылдын 1-январынан тарта 31-декабрга чейин созулат. Бул туурасында Россиядагы колдонуучулардын жана адам жашоосунун жайлуулугун көзөмөлдөгөн федералдык кызматтын (Роспотребнадзор) сайтында айтылат.
Маалыматта кызамыкка кабылгандар бардык өлкөдө көбөйүп жаткандыктан эмдөө жүргүзүлүп жатканы белгиленет.
Мигранттар арасында эмдөө ишин жумуш берүүчүлөр менен региондогу саламаттыкты сактоо өкүлдөрү камсыз кылат.
Бүткүл дүйнөлүк саламаттык сактоо уюмунун маалыматы боюнча, былтыр кызамыктан 140 миңден ашык адам каза тапкан. Россияда бир жылда 4 миңден ашык адам аталган илдетке кабылары аныкталган.
Россияда 2019-жылы кызамыкка каршы бир миллиондон ашык адам эмдөөдөн өткөн. Анын 181 миңи мигранттар болуп саналат.