БИШКЕК, 2-янв. — Sputnik. Кыргызстандын футбол боюнча курама командасынын коргоочусу Азамат Байматов малайзиялык "Куала-Лумпур" клубу менен бир жылдык келишим түздү. Бул тууралуу аталган клубдун социалдык тармактагы расмий баракчасында жарыяланды.
Кыргызстандык футболчу 2020-жылы Малайзиянын премьер-лигасындагы командада ойномокчу.
Футболчунун өзүнүн айтымында, ага бир эле учурда эки клубдан чакыруу түшкөн.
"Малайзиялык клубдан тышкары, индонезиялык дагы бир командага чакырышты. Мен Малайзияны тандадым. Анткени мага кайсы шаарда жашарым да маанилүү. Учурда үй-бүлөм менен Куала-Лумпурдабыз. Жаңы командамда жети деген номер менен ойногону жатам", — деди спортчу.
Ал буга чейин бир катар чет элдик клубдарда ойноду. 2009-жылы Латвиянын "Вентспилс" клубунун курамында өлкө чемпионатынын призёру болгон. 2011-2012-жылдарды "Сибирь" клубу (Новосибирск) менен өткөрдү. Андан соң мекенине кайтып келип ("Дордой"), кийин 2015-2017-жылдары бахрейндик клуб менен келишим түзгөн. Ал эми 2018-жыл "Борнео" клубунда (Индонезия) эмгектенди.
Өткөн сезондо Байматов бишкектик "Дордойдун" курамында өлкө чемпиону боло алды.