БИШКЕК, 30-дек. — Sputnik. 8-12-январь аралыгында Караколдо биринчи ирет "Оймо — кыш 2020" фестивалы өтөт. Бул тууралуу уюштуруучулар билдиришти.
Иш-чарага усталар, кол өнөрчүлөр, борборазиялык дизайнерлер, туристтер, Караколдун жашоочулары жана башкалар катышат.
Программага ылайык, мастер-класстар, Кыргызстан менен Борбор Азиянын кол өнөрчүлөрүнүн жарманкеси уюштурулат. Ошондой эле кыргыздардын, дунгандардын жана орустардын "элдик тез татымдары" коюлат.
Иш-чаралардын көпчүлүк бөлүгү Касымалы Жантөшев атындагы Ысык-Көл облустук музыка-драмалык театрында өтөт.
"Оймо" эл аралык фестивалы Кыргызстанда 2006-жылдан бери өткөрүлүп келет. Жарманке адатта жай айларында Бишкек шаарында башталып, Ысык-Көлдүн жээгинде уланып келген.
Sputnik Кыргызстан эл аралык маалымат агенттиги жана радиосу фестивалдын медиа өнөктөшү болуп саналат.