БИШКЕК, 30-дек. — Sputnik. Бүгүнтөн, тагыраагы, 30-декабрдан тарта, Кыргызстан боюнча мамлекеттик жана менчик нотариалдык мекемелерде автоматташтырылган "электрондук нотариат" долбоору тесттик режимде ишке кирет. Бул туурасында Юстиция министрлигинин маалымат кызматынан кабарлашты.
Аталган министрликтин жетекчиси бул жаатта атайын буйрукка кол койгон.
"Тест эгер аталган долбоорду ишке ашырып жатканда кандайдыр бир кемчиликтер байкалса, иштеп чыккандар кайрадан карап, анын туура эмес жерлерин оңдош үчүн жасалууда", — деп айтылган таратылган маалыматта.
Министрликтен буга чейин мамлекеттик нотариалдык мекемелерге жабдуулар берилгенин айтышты. Андан сырткары, жеке жана мамлекеттик нотариустар автоматташтырылган "Электрондук нотариат" маалымат системасы боюнча окутуулардан өткөндүгүн кошумча билдиришти.