Мискенбаев абакка отургузулуп, Жолдубаева үй камагына жиберилди.

БИШКЕК, 28-дек. — Sputnik. Биринчи Май райондук соту КСДП төрагасынын милдетин аткарган Асел Кодуранованы, мурунку президент Алмазбек Атамбаевдин кеңешчиси Кундуз Жолдубаеваны жана КСДП төрагасынын орун басары Ирина Карамушкинаны үй камагында калтыруу, ал эми КСДПнын мүчөсү Мээрбек Мискенбаевди 9-февралга чейин тергөө абагына киргизүү боюнча чечим кабыл алды. Бул тууралуу аталган соттон билдиришти.

Эскерте кетсек, буга чейин төртөөнүн Биринчи Май райондук сотуна алып келингени айтылган.

Жактоочу Замир Жоошевдин айтымында, аты аталгандардын төртөө тең Кой-Таш окуясы учурунда массалык башаламандык уюштуруу жана бийликти күч менен басып алууга аракет жасоо боюнча шектелип жатышат.

Кой-Таш окуясы

Баары экөөбүздүн колубузда эле... Жээнбеков Атамбаев тууралуу айтты. Видео

25 Бештин айы 2019, 21:11

Үстүбүздөгү жылдын 7-августунда Алмазбек Атамбаевди кармоо боюнча операция уюштурулуп, УКМКнын атайын даярдыктагы бөлүгү анын Кой-Таштагы үйүнө барган. Бирок мурунку президенттин тарапташтары каршылык көрсөтүп, операция ишке ашкан эмес. Эртеси ИИМдин аракети менен Атамбаев багынып берген.

Мурунку президент УКМКнын тергөө абагына камакка алынып, бир топ тарапташы да кармалган.

Кой-Таш окуясынан бир киши каза таап, 175 адам дарыгерлерге кайрылган.